Wasaarada Arrimaha dibada ayaa Warsaxafadeed ay ku baahisay bogeeda waxay kaga hadashay Arrimaha Doorashooyinka iyo xaalada Laascaanood waxaana lagu yidhi,
“Xukuumada Jamhuuriyada Somaliland waxay Beesha caalamka la wadaagaysa Walaaca ku saabsan shaqaaqada ka sii socota Laascaanood ee ka dhalatay dilkii loo gaystay mid ka mid ah siyaasiyiinta Somaliland bishii December, ka dibna ay ciidamo shisheeye soo galeen, weerarana lagu qaaday goobo rayid ah oo ay ka mid yihiin halkii ay deganaayen qaar ka mid ah Golaha Wasiirada Somaliland.
Dawlada Somaliland waxay dib ula soo noqotay ciidamadeeda amaanka ee Laascanood ku sugnaa, waxay ku dhawaaqday xabbad-joojin hal dhinac ah waxayna ku dhiirigelisay dhammaan dhinacyada kale inay la qaatan.
Xukuumadu waxa kale oo ay taageertay Ergo nabadeed oo ay odayaasha dhaqanka ee beelaha Somaliland ku bilaabayeen wada hadalo , waxaanay soo dhawaysay dhexdhexaadinta dawladaha jaarku ku dhexdhexaadiyeen joojinta colaada.
Si kastaba ha ahaatee, dadkii kiciyay khilaafkan ayaa diiday dhammaan dadaalladaas Taas beddelkeeda, waxay sii wadeen hurinta, colaadda si ay u sii khalkhaliyaan xasiloonida gobolka ugana soo horjeestaan qarannimada Jamhuuriyadda Somaliland.
Ilaa hadda, wada xaajoodkii lala yeelan lahaa hoggaamiyeyaasha bulshada deegaanka ayaa lagu fashiliyay weerarro sii kordhaya oo ay gaysteen kooxo badan oo hubaysan. Kooxahan ayaa isugu jira xubno ka tirsan Al-Shabaab, kuwaas oo laga soo barakiciyey Meelaha Soomaliya ee ay ku sugnaayen, xubno ka tirsan ciidamada Puntland, iyo ciidamada qaranka Soomaaliya, oo uu ku jiro taliyaha sare ee guutada 4-aad ee Maraykanku tababaray. “Danab Brigade”, oo markii dambe la dilay.
Iyadoo ay xaaladdan adagi jirto, haddana weli wax jawaab ah lagama helin codsiyadii dawladda Somaliland ee ku aaddanaa taageerada Maraykanka si ay ugu qanciso maamulka Puntland inay joojiyaan Ciidamada iyo hubka ka soo qulqulaya dhulkooda ee Laascaanood imanaaya.
Taasi waxay keentay in maleeshiyaad hubaysan ay ka hawlgalaan magaalada Laascaanood, kuwaas oo baqdin geliyey hoggaamiyeyaasha deegaanka ee doonaya inay wada-hadallo siyaasadeed la yeeshaan dawladda.
Caqabadahaas oo jira waxa naga go’an in aan hirgelinno doorashooyin dimuqraadi ah, oo ah xuquuq ay dawladdu ilaalisay iyo hannaan tusaale u ah deegaanka.
Sida sharcigu dhigayo, komishanka doorashooyinka qaranka waxa loo igmaday inay qabanqaabiyaan doorashooyin ka dhaca Dalkayaga, Sidaa darteed, komishanka doorashooyinka qaranka ayay masuuliyadi ka saaran tahay inay dejiyaan qorshe-hawleedkii doorashada.”
