Akhristeyaal qormadeena Dhaqanka iyo Suugaanta todobaadkan waxa aynu ku soo qaadanaynaa tix gabay ah oo uu tiriyey Abwaan Abdiraxmaan Xirsi Qodax (Cabdi Tahar), gabaygaas oo bulshada ku wacyi-gelinaya wadciga siyaasaddeed ee xilligan dalka ka jira inay ka yeeshaan hubsiimo iyo fiirro ku aaddan dadka hamiga siyaasaddeed orodka ugu jira, qaabka ay wax u doonayaan iyo shakhsiyaadka aqoonta loo leeyahay.
Gabaygan oo la yidhaahdo magaciisa HURGUF, waxa uu farta ku fiiqayaa oo uu bulshada uga digayaa inay ku tasoobaan ama ku khatalmaan inay mar kale gaawaha u dhaamiyaan rag siyaasiyiin ah oo shalay iyagoo xilal haya aan waxyeello mooyaane wax tar uga tegin shacbiga, kuwaasoo uu abwaanku leeyahay dadyahow kuwii ayaa maanta idinka doonaya in aad cod iyo cudud siisaan, si ay mar kale idiin hadimeeyaan.
Gabayga Huruf wuxuu ku bilaabay sidan:
Ha’da gabay higgaadiyo murtida isuma hawleene
Inyaroo hagaag raadisoo,halganta mooyaane
Dad halawsan duul dhamasanoo heeryo lagu tuuray
Hadhka labada galin baan tilmaan soo hordhigayaaye
Ninka hallo ku aaminay dhurwaa qabay hamuuntooda
Hilbo hadiyad lagu siiyey baa loogu huray kayne
Mar haduu afkii ku hubsaduu,una hambayn waayey
Ilayn kuma halayn karo caqligu,habar dugaag geele
Haddoodaa gashiyo waa run buu,hadal ka taag naaye
Ana waxaan ku haystaa kaskii,hebedka saarnaaye
,Hayin gibil madaadsha ah ninkii,ubad u heeryeystay
Iyo kaan hogaan baran ninkii tiisa ku halaystay
Kala hufan garaadkiyo intay kala horeeyaane
Noloshuna hubsiimiyo haday waydo,hillin toosan
Hantaaqiyo lur iyo foolxumay,kugu halaagtaaye
Garashada hagaastiyo indhaha hogosho bayroobay
Miyeydaan halkaa ila arkayn waxaa ka hooseeya.?
Digo rogosho waa laga hodmaa,guri habaas wayne
Hinqashaa ku filan meel haduu dulinku,hoos yaale
Hurguf oo hadana jiifso waa,hawl is daba eede
Dadna waa hiraaliyo dhabcaal,amase haanreefe
Marna waa mid kula soo hadhiyo,kuma haleeyaane
Hadba waxaad u sacab jiibisaan,laguma hoydaane
Haaddaan iyo wuxuu kula maraa,hirigta waawayne
Hoobashana waxaad kula dhacdaan,naarta haawiya e
Markay hawli joogtiyo markay himilo soo gaadho
Hormoodkiinu waa kuwaan ogaa,hadimadoodiiye
Sidiibay haliil iyo ma tudhe idinku haystaane
Habar wacasho hayb iyo qabiil,lagu hogaan siiyo
Hadhawtiyo bariyo saadambaa,lagu hafeeftaaye
Miyeydaan halkaa ila arkayn waxa,ka hooseeya.?
Dadka kala hufkiisana hadaan,haad u kala qaado
Qof hadduu u harrag waafi dayo,hebel garaadkiisa
Nin la hubo hufnaan iyo aqoon,soo hor marin waaye
Hanfadiyo wuxuu kuu boqraa hoori aan taline
Kuwii horumarkoodiyo la hadhay,hawl u fulintooda
Ama dhacay hantiyo maal aduun,shacabka hayntiisa
Ama soo hagraday waa horoo,hayjad ula guuray
Dad u heellan oo ga’ma,sanoo,hoos u wada jeeda
Dalkiinaa hurroow laga helaa,duul u tuma heese.
Hinji oo tunkaw rido hadaad,galiso haabkaaga
Holoshada adoo dhiiran baa soo,haf siin kara e
Qof haduu awood iyo itaal,haysto muruqiisa
Hoos ka liig haduu yahay caqligu,haakah odhan waaye
Miyeydaan halkaa ila arkayn,waxa ka hooseeya.?
Rag hamiyey haduu hawl u kaco,wuu hir galiyaaye
Hamhamtiyo halaasiga barjaha,hadalka meel waayey
Hadhqoodaalka kama sii durkiyo,hadalo hayntaase
Hororkiyo hamaansigii orgome,hurintii weeyaane
Lama garab hawaarsado qof aan,haan biyeyn karine
Gacan haadis waa lagu dagmaa,laguna heermaaye
Hoosaasaha dar baa lagu hodaa,higilka qaarkiiye
Humaagiyo lugooyada adoon kula habeen guurin
Hubsiimiyo waxaa kula gudboon,soo hakiyo diide
Hadimada hogiyo ceelka qodan,bohosha hoosaysa
Hadhka goodka jiifiyo maskiyo halaqa duuduuban
Waw halis qofkii aan indhaha aad u kala hayne
Miyeydaan halkaa ila arkayn waxaa ka hooseeya.?
Aduunyada horaysiyo gadaal,kor u hayaankeeda
Hanka damacu leeyahay hadii loo,hanqalo taago
Waxaa huubo laga dheefayaa waa habaar qaba e
Halyey adag hogaamiye dhabaa,taash la huwiyaaye
Heshiis kuma gashaan maalintaa loo hibayn kara e
Hayeeshee lugaha waad kartaan,inaad ka haysaane
Wax ku huran adoo kara haday,hibasho kuu keento
Waxaad tahay hurdaysane socdoo,hiifid laasimaye
Lama hure naftaw hura bulshada,uma hilawdaane
Rajaad ula halmaantaan ninkaad,hadaw ka leefteene
Hamaan iyo dulmiga maalin baa,laga huleelaaye
Darkii shalay ku hololoobiyaad,hiil ka sugaysaane
Hanfigiyo cadceedaba kolbaa,laga hadh doontaaye
Cilmi horumar lagu tiigsadoo,hiigsi lagu gaadho
Kuwaan ugu hanwaynaa kolkaan,halacsi daymooday
Garaadkay hangool uga noqdeen,huwantay eedeene
Hantaaqiyo kuwaan soo arkee,laabta kala haystay
Waa hiil ku taxan meel kaliyo,duunyo u hadaafe
Hunguriga xadhkaha goostay iyo hadhimo doondoonka
Milgo hirasho khayrliyo ka dhibay,haybad iyo doore
Miyeydaan halkaa ila arkayn,waxa ka hooseeya.?
Wadamadan hawada fuushanee,dayaxa soo haabtay
Ama horumar lagu faani karo,haatan wada gaadhay
Dhalinyaro horseediyo rag baa heegadaa dhigaye
Hubka meel lakala jeediyooy,hugunto baaruudu
Hangal dumar la saariyo rasaas hooyo lagu laayo
Iyo ubad la wada hoojiyoo,wada hiqlaynaaye
Hoygooda soomaalidaa lagu, hayaa taase
Ma huraan hadii ay noqdaan,aan is wada haysan
Dagaal laysku hoobtiyo dilbaan,lagu halaagmeene
Ummad wali haldoorkoodu yahay hoojiyaha laaya
Sida habasta uun baa buskiyo boodh la huwiyaaye
Miyeydaan halkaa ila arkayn waxa,ka hooseeya.?
Haye sami qofkii lagu bartaa,hiida laasimaye
Halbawlaha ninkii lagu dhuftiyo,haamadiyo beerka
Hujuun iyo wuxuu taag hayuu,kala hor boodaaye
Kuma sugo haduu jaro qofkii,haanka beegsadaye
Kolku dage horayn jiray hadaad heegan ugu joogto
Kuma soo huluushado adoo,soo hambaabiraye.
Wax halaaba mooyee nimaan rabin hagaagiina
Ama aan dan guud hawl u galin,gudub hayaankiisa
Hafashiyo hiinraag iyo dhib baa lagala hoydaaye
Horwayn gaanna oo gudhan haday,hali ka soo dhiiqdo
Maatida hadhuubkeeda waa laga,hingoodaaye
Ma damqade hadaan looga hirin,hoos u dhugan waaye
Ma hambeeye lagu aaminniyo,heemsadiyo
laaste
Harraad iyo ka tali gaajadaa,haysa ubadakiiye
Ma hagiyo haddaad garabsataan,tan u hadaafkiise
Kolay hiigsan maysaan libtaad,ku hindisootaane
Sida loo hareer maro hadaad,barato haydaarta
Sida looga haajiraad u garan,halista laayaane
Haddaad horumarkiiniyo rabtaan,nolosha heerkeeda
Waxaa guusha laga hoorsadaa,himilo waayeele
Miyeydaan halkaa ila arkayn waxa,ka hooseeya.?.
